வலைத்தளத்தில் சில மாற்றங்கள்

எனது வலைத்தளத்தில்[www.higopi.com] சில மாற்றங்கள் செய்யப்பட்டுள்ளன:

1. தளத்தின் அனைத்து வலைப்பக்கங்களும் க்ணூ FDL உரிமத்தின் கீழ் கொண்டு வரப்பட்டு விட்டன.
   
2. தளத்தில் பயன்பாட்டில் உள்ள அதியமான், தகடூர் உட்பட அனைத்து கருவிகளும் அடுத்த வெளியீடு (2.0) செய்யப்பட்டு க்ணூ GPL உரிமத்தின் கீழ் கொண்டு வரப்பட்டு விட்டன.
   
3. பக்க அமைப்பின் வார்ப்புரு மாற்றப்பட்டுள்ளது.
   
4. News மற்றும் FORUM பிரிவுகள் புதிய வார்ப்புருவில் அமைக்கப்பட்டு இயக்கத்தில் உள்ளன.
   

புதிய வார்ப்புரு தெரிவதில் ஏதேனும் பிரச்சனை இருந்தால் உங்கள் உலாவியின் Cache ஐ நீக்கிவிட்டு மறுபடி உலாவிப் பாருங்கள்.

மேலும் இந்த க்ணூ GPL உரிமத்தின் கீழ் நிரல்களை மறுபயன்பாட்டிற்காக எடுத்தாளும் போது கவனத்தில் கொள்ள வேண்டியவை:

1. நிரல்களை யார் வேண்டுமானாலும் க்ணூ GPL உரிமத்தின் அனைத்து விதிகளுக்குட்பட்டு நிரல் மாற்றம் அல்லது மறுபயன்பாடு செய்யலாம்.
   
2. நிரல்களின் Comments ல் மூல நிரல் என்னுடையது என்பது குறித்துள்ள எந்த வரிகளும் நீக்கப்படவோ மாற்றப்படவோ கூடாது.
   
3. இந்த உரிமம் கட்டற்ற திறவூற்று நிரலுக்கானது, எனவே இதர கட்டற்ற திறவூற்று நிரலுடன் மட்டுமே சேர்த்துப் பயன்படுத்தவோ மறுவெளியீடு செய்யவோ முடியும். எந்த தனியுரிமை (Properitory) நிரலுடனும் சேர்த்து பயன்படுத்தவோ அல்லது சேர்த்து மறு வெளியீடு செய்யவோ முடியாது.

சமீபத்தில் எனது நிரல்களை பயன்படுத்துவது தொடர்பாக ஏற்பட்ட சில பிரச்சனைகளால் இந்த உரிமப் பதிவுகள் செய்யப்பட்டுள்ளன.

உங்கள் ஆதரவுக்கும் தொடர்ந்து அளித்து வரும் ஊக்கத்துக்கும் நன்றி.

மன்றம்(FORUM) சேவை துவங்கப்பட்டது

எனது வலைத்தளத்தில் உலாவியவர்கள் அதில் FORUM பகுதியை பார்த்திருக்கக் கூடும். இது நாள் வரை கட்டமைப்பில் இருந்த அந்தப் பகுதியில் இப்போது மன்றம்(FORUM) சேவை துவங்கப் பட்டுள்ளது.

http://www.higopi.com/forum/

எனக்கு வரும் மடல்களில் பல ஒரே தொழில்நுட்பக் கேள்வியை கேட்டு வரும். ஒரே பதிலை நானும் திரும்பத் திரும்ப அனுப்பி வைப்பேன். இதைத் தவிர்க்கவும், பொதுவான தொழில்நுட்பக் கேள்விகளை பொதுவில் வைத்து விடையளிக்கவும் வசதியாக இந்த மன்ற சேவையை துவங்கினேன். இதன் மூலம் நான் மட்டுமல்ல, ஒருவருக்கு தெரியாத கேள்விகளுக்கு இதர உறுப்பினர்கள் கூட பதில் அளிக்க இயலும்.

தற்போது தொழில்நுட்ப சந்தேகங்கள் மற்றும் தமிழ் மென்பொருட்கள் என முழுவதும் கணினி தொழில்நுட்பம் சார்ந்த இரு பகுதிகள் ஆரம்பிக்கப் பட்டுள்ளது. இனி வரும் காலத்திலும் முழுவதும் தொழில்நுட்பம் சார்ந்த மன்றமாகவே செயல்படும்.

ஏற்கனவே பல வலைத்தளங்களில் இருக்கும் தொழில்நுட்பம் சார்ந்த மன்ற சேவைகளுக்கும் இதற்கும் ஒரு வேறுபாடும் இல்லை. எனது வலைத்தளத்தில் இருக்கிறது என்பதைத் தவிர.

இந்த மன்ற சேவையில் உள்ள தலைப்புகளை/பதில்களை பார்வையிட உறுப்பினர் ஆக வேண்டிய கட்டாயமில்லை. புதிய தலைப்பு தொடங்கவோ அல்லது பதிலளிக்கவோ உறுப்பினரால் மட்டுமே முடியும்.

இந்த மன்றத்தின் செய்தியோடை http://higopi.com/forum/extern.php?action=active&type=RSS என்ற சுட்டியில் கிடைக்கும்.

இந்த மன்ற சேவையைப் பயன்படுத்த அனைவரையும் அழைக்கிறேன்.

கனவில் வந்த பாலாபாய் (பா.க.ச பதிவு)

பா.க.ச மக்களே, நேத்து ராத்திரி கனவுல நம்ம பாலாபாய் வந்தாரு. (அவனவனுக்கு நமீதா, திரிஷா, ஜோதிகா, பூமிகா, அசின் இவங்க எல்லாம் கனவுல வருவாங்க. அட, 'சமீபத்துல' பொறந்தவங்களுக்கு கூட அட்லீஸ்ட் ஒரு ஜெயமாலினி, ஜோதிலட்சுமியாவது வருவாங்க... ஹூம்... என் நெலமயப் பாருங்க. )

சரி வந்தாரா... என்ன விசயம்னு கேட்டேன். சொந்தமா ஒரு எழுத்துரு செஞ்சிருக்கறதா சொல்லி அதைப் பயன்படுத்திப் பாத்து கருத்து சொல்ல சொன்னாரு. என்னடா இது... நாம இருக்குற எல்லா எழுத்துருவையும் ஒருங்குறிக்கு மாத்தச் சொல்லி பாக்குற எல்லாரையும் கேட்டுக்கிட்டு இருக்கோம்... இவர் என்னாடான்னா அவரே உருவாக்கி தராரே அப்படின்னு ஒரே சந்தோசமாயிடுச்சி.

சரின்னு நானும் அந்த எழுத்துருவை நிறுவி டைப் பண்ணிப் பாத்தேன். அது என்னடான்னா, எந்த கீயை தட்டினாலும் 'பா.க.ச... பா.க.ச... பா.க.ச...' இதத் தவிர வேற எதுவுமே வரமாட்டேங்குது.

அப்படி என்னத்தை இந்த எழுத்துருவில மாத்தியிருக்காருன்னு பாத்தா... அந்தக் கொடுமைய நான் ஏன் சொல்லனும்... நீங்களே பாருங்க...

அப்புறமா போன் பண்ணி அது என்னங்க காப்பி லெப்டு, ரைட்டு, டாப்பு, பாட்டம் அப்படின்னு பாலாபாய் கிட்ட கேட்டேன். அதுக்கு அவர் சொன்னது:

"அதாவது, ரைட்டு கை பக்கமா இருந்து காப்பி அடிச்சா அது காப்பிரைட்டு. லெப்டு கை பக்கமா இருந்து காப்பி அடிச்சா அது காப்பிரைட்டுலெப்டு. மேல இருந்து காப்பி அடிச்சா அது காப்பிடாப்பு, கீழ இருந்து காப்பி அடிச்சா அது காப்பிபாட்டம்"

இந்த விளக்கத்தை கேட்டு அப்படியே எனக்கு புல்லரிச்சி போச்சிங்க. உங்களுக்கு ?

அதியன் 2.0.4 வெளியீடு

அதியன் ஃபயர்ஃபாக்ஸ் நீட்சியின் அடுத்த வெளியீடான 2.0.4ஐ இங்கே தரவிறக்கம் செய்து நிறுவிக் கொள்ளலாம்.

மாற்றங்கள்:

1) குமுதம், தினகரன் ஆகிய வலைத் தளங்களின் சில வலைப்பக்கங்களில் திடீரென ஒருங்குறி மாற்றம் செயல்படவில்லை (மற்ற தளங்களிலிருந்து நேரடியாய் விளம்பரம் வெளியிடும் தளங்களில் Firefox Security Exception காரணமாக இந்த பிரச்சனை ஏற்பட்டது.) இவ்வழு இப்போது சரி செய்யப்பட்டுவிட்டது.

இந்த வெளியீடு மொசில்லா நீட்சிகள் தளத்திலும் கிடைக்கும். ஏற்கனவே இந்நீட்சியை நிறுவியுள்ளோரின் உலாவிகள் புதுப்பிக்க சோதிக்கும் போது தானியங்கு முறையில் தரவிறக்கி புதுப்பித்துக் கொள்ளும்.

பி.கு: இந்த வெளியீடு சில நாட்களுக்கு முன்பே பதிவிறக்கக் கிடைத்தாலும் இது குறித்த அறிவிப்பை இன்றுதான் வெளியிட முடிந்தது (அலுவலகத்துல ஆணி அதிகமாயிடிச்சிங்க)

அவ்வ்வ்வ்வ்வ்வ்வ்வ்வ்...

அப்பாடா... சென்னை வலைப்பதிவர் பட்டறை '07 நல்ல படியா முடிஞ்சதுங்க.

நிகழ்வுகளைப் பத்தி வந்த பதிவுகளை நீங்க படிச்சிருப்பீங்க. இன்னும் படிக்காதவங்க எல்லாம் ஸ்னாப் ஜட்ஜ்மெண்ட்க்கு ஒரு நடை போய் பாத்து எல்லாத்தையும் ஒரே மூச்சுல படிச்சிட்டு வந்துருங்க பாக்கலாம்... (நானும் எல்லாத்தையும் திருப்பித் திருப்பி சொல்லி உங்கள ப்ளேடு போட வேண்டியிருக்காதில்ல...)

சரி சுருக்கமா சொல்றேன்.

நெறய பேரை முதல் முறையா பாக்க முடிஞ்சதுல ரொம்ப சந்தோசமா இருந்ததுங்க. தொலைபேசி மூலமா ரஜினி ராம்கி, தல பாலா அப்புறம் இன்னும் கொஞ்சம் பேரு கூட பேசியிருக்கேன்னாலும் நேரிலே பாக்கறதுன்றது வேற இல்லீங்களா...? ஆனா என்ன... யாரோடுமே அதிகமா பேச முடியலைன்ற ஒரே குறைதான்.

அப்புறம் நிகழ்ச்சியில யாரு பேசினாங்க என்ன பேசினாங்கன்றதெல்லாம் நீங்க ஏற்கனவே படிச்சிருப்பீங்க. தட்டச்சுப் பயிற்சியிலும் செயல் விளக்க வகுப்பிலேயுமே அதிக நேரம் இருந்ததால அரங்கத்துலயும் வெளியேயும் நடந்த நெறைய விசயங்களை கவனிக்க முடியலை. பட்டறை சம்பந்தமான பதிவுகளை படிக்கும் போது தான் அடடா! இவ்வளவு நடந்ததா? அப்படின்னு தெரியுது.

"துன்றத்துக்கு..." நல்லா இருந்துச்சி. தல பாலா தான் பாவம் ஒடஞ்சி போன தயிர்சாத பொட்டலத்தையெல்லாம் வழிச்சி தொடச்சிக்கிட்டு இருந்தார்.

புதுசா ஃப்ளாஷ் கத்துக்கிட்டேன். பினாத்தலாருக்கு நன்றி.

கடைசி வரைக்கும் எழுத்துரு மாற்றப் பயிற்சியை மட்டும் என்னால கொடுக்க முடியலைன்னு நான் பொலம்பிக்கிட்டு இருந்ததை பாத்து பாவம் போவட்டும்னு கடைசியா க்ருபாவும் பொன்ஸும் ஒக்காந்து கேட்டாங்க. எழுத்துருக்களை ஒருங்குறிக்கு மாத்த இன்னும் நிறைய பேரை பிடிக்கனும். பாக்கலாம்...

இப்போதைக்கு வேற ஒன்னும் தோனலைங்க... அவ்ளோதான்...

அது சரி... தலைப்புக்கும் பதிவுக்கும் என்ன தொடர்புன்னு கேக்கறீங்களா? அரங்கத்துக்கு வந்தப்போ பெயரை கேட்டு பேட்ஜ் எழுதின ராஜா முதல், நிகழ்ச்சி முடிஞ்சி வீட்டுக்கு போற வரை எல்லாருமே "கோபி"ன்னு சொன்னா உடனே "ஹை கோபியா?" அப்படீன்னு கேட்டதால மனசுக்குள்ள கேட்ட சவுண்டு தாங்க அது... அட யாருமே இந்த இடுகையை படிக்கலையா... இல்ல... வேணுமின்னே கலாய்க்கறாங்களான்னு தெரியலை... ஏன்...? எதுக்கு இந்த கொல வெறி...?

சரி. நெக்ஸ்ட் மீட் பண்றேன்.

அடுத்த பட்டறை எங்கேப்பா? சீக்கிரம் அதுக்கான வேலையை ஆரம்பியுங்க. முன்னாலயே நம்மளுக்கும் ஒரு கடுதாசி தட்டிடுங்க. (வந்து சேர வசதியா இருக்குமில்ல)

அதியன் 2.0.3 வெளியீடு

அதியன் ஃபயர்ஃபாக்ஸ் நீட்சியின் அடுத்த வெளியீடான 2.0.3ஐ இங்கே தரவிறக்கம் செய்து நிறுவிக் கொள்ளலாம்.

மாற்றங்கள்:

1) TSCII -> ஒருங்குறி மாற்றத்தில் ஒரு சிறிய வழு சரிசெய்யப்பட்டது.
2) TAB மற்றும் TAM தகுதரங்களிலிருந்து ஒருங்குறிக்கு மாற்றும் வசதி சேர்க்கப்பட்டுள்ளது. (இதன் மூலம் தினகரன் போன்ற நாளிதழ் வலைத் தளங்கள், குமுதம், விகடன் ஆகிய வலைத் தளங்களை ஒருங்குறிக்கு மாற்றி படிக்க/சேமிக்க இயலும்.)

இந்த மாற்றங்கள் அதியமான் மாற்றியிலும் சேர்க்கப்பட்டுவிட்டன.

இந்த வெளியீடு மொசில்லா நீட்சிகள் தளத்திலும் கிடைக்கும். ஏற்கனவே இந்நீட்சியை நிறுவியுள்ளோரின் உலாவிகள் புதுப்பிக்க சோதிக்கும் போது தானியங்கு முறையில் தரவிறக்கி புதுப்பித்துக் கொள்ளும்.

தமிழ் விசை 0.3.2 வெளியீடு

தண்டர்பர்ட் மின்னஞ்சல் செயலியின் புதிய வெளியீடான 2.0.0.0 சமீபத்தில் வெளியிடப்பட்டது. இந்த புதிய செயலியில் பதிப்பு வேறுபாடுகள் காரணமாய் தமிழ்விசை 0.3.1 இயங்க மறுத்தது.

இந்த வழுவை சரி செய்து தமிழ்விசையின் அடுத்த பதிப்பான 0.3.2 இன்று வெளியிடப்பட்டது.

இந்த புதிய பதிப்பை பதிவிறக்கி நிறுவ http://tamilkey.mozdev.org/installation.htmlல் சொல்லியபடி செய்யவும். இந்த வெளியீட்டில் புதிய வசதிகள் ஏதும் சேர்க்கப்படவில்லை. எனவே, ஃபயர்ஃபாக்ஸ் பயன்படுத்துவோர் தமிழ் விசை 0.3.1 லிருந்து புதுப்பிக்க வேண்டிய அவசியம் இல்லை.

விரைவில் https://addons.mozilla.org/en-US/firefox/addon/2994 தளத்திலும் இந்த புதிய பதிப்பு கிடைக்க வகை செய்யப்பட்டுள்ளது. இந்தத் தளத்தில் தமிழ்விசை 0.3.2 தரவிறக்க கிடைக்கும் போது தற்சமயம் இந்த நீட்சியைப் பயன்படுத்தும் கணினிகளில் தானியங்கி முறையில் புதிப்பித்துக் கொள்ளும்.

பிற்சேர்க்கை: இந்த வெளியீட்டில் வழு ஏதும் தெரிவிக்க விரும்புவோர் http://tamilkey.mozdev.org/bugs.html என்ற முகவரியில் தெரிவிக்க வேண்டுகிறேன்.

யார் இந்த ஹாய் கோபி/ஹைகோபி ?

வலைப்பதிவு உலகில் சிலருக்கு ஹாய் கோபி/ஹைகோபின்னா யாரு, என்ன விவரம் அப்படின்னு தெரிஞ்சிக்க ஆவல் இருந்திருக்கும். இந்த ஹாய் கோபி/ஹைகோபின்னு சொல்றாங்களே யாருங்க அது? அதைத் தெரிஞ்சிக்க எனக்கும் கூட ஆவலாத்தான் இருந்துச்சி.

கோபிங்கற பேரு திடீருன்னு எப்படி ஹாய் கோபி/ஹைகோபின்னு மாறுச்சி? என்னோட பதிவர் விவரப் பக்கத்துல கூட நான் "கோபி(Gopi)"ன்னு தானே குறிப்பிட்டு இருக்கேன்? யாருகிட்டயும் நான் என்னை ஹாய் கோபி/ஹைகோபி அப்படின்னு அறிமுகப்படுத்திக்கிட்டதில்லையே. அப்படி இருக்கும் போது எப்படி எனக்கு திடீர்ன்னு ஹாய் கோபி/ஹைகோபின்னு பேரு வச்சாங்க?

யோசிச்சி பாத்தா தான் தெரியுது அது என்னோட வலைத்தளப் பெயரால வந்ததுன்னு. வலைத்தளம் பதிவு செய்யும் போது http://www.gopi.com/ என்ற பெயரில் ஒரு வலைத்தளம் ஏற்கனவே பதிவு செய்யப்பட்டுவிட்டதுன்னு சொன்னாங்க. பொதுவா வலைத்தளப் பெயர்கள் எளிதாக தட்டச்சு செய்ய வசதியாக சில எழுத்துக்களில் இருக்கவேண்டும் அதே சமயம் அர்த்தமுள்ளதாகவும் இருக்கனும். என்ன பெயர் வைக்கலாம்னு யோசிச்சப்ப "Say Hi to Gopi" என்று பொருள் வரும் வண்ணம் http://www.higopi.com/ என்று பதிந்தேன்.

அட எனக்கு ஒரு "Hi" சொல்லச் சொன்னா என்னையே ஹாய் கோபி/ஹைகோபி ஆக்கீட்டீங்களே.

சரி விசயத்துக்கு வருவோம். இன்றைக்கு வலைப்பதிவுலகத்தில் பல "கோபி"க்கள் இருக்கோம். அதனால் வெறும் "கோபி" என்று சொன்னால் குழப்பம் வரும் என்பதால் என்னை ஹாய் கோபி/ஹைகோபி என்று அழைத்திருப்பீர்கள். ஆனால் தமிழில் ஹாய் கோபி/ஹைகோபி என்று சொல்லும்போது அது ஒரு நல்ல பெயர்ச் சொல்லாகவோ அல்லது அர்த்தமுள்ள சொல்லாகவோ இல்லை.

எனவே, என்னை குறிப்பாக வேறுபடுத்தி விளிக்க விரும்புவோர் "தகடூர் கோபி"என அழைக்குமாறு பணிவன்புடன் கேட்டுக் கொள்கிறேன்.

பழசு புதுசு தொடர் பதிவு - தமிழ்மணம்

ஒன்றுக்கொன்று தொடர்புடைய சில பழைய/புதிய படங்களை பதித்து அவற்றை ஒப்பிட்டு அவரவர் பார்வையில் தோன்றும் எண்ணத்தை பகிர்ந்து கொள்ளும் ஒரு தொடர் பதிவு முயற்சி.

சரி ஆரம்பிக்கலாமா? முதலில் தமிழ்மணம் குறித்த சில படங்கள் கீழே.

தமிழ்மணம் ஆரம்பித்த மாதத்தில் அதன் பதிவுகள் பக்கம்



தமிழ்மணம் ஆரம்பித்தபோது பதிவர் எண்ணிக்கை விவரம் (215)



தமிழ்மணம் முகப்புப் பக்கம் (சென்ற வாரத்தில் ஒரு நாள்)


தமிழ்மணம் பதிவர் எண்ணிக்கை விவரம் (சென்ற வாரத்தில் ஒரு நாள்)



(படங்களை முழு அளவில் பார்க்க அவற்றை சொடுக்குங்கள்)

மேலோட்டமாக பார்த்தபோது. என் பார்வையில் அன்றைக்கும் இன்றைப் போலவே எல்லா விதமான பதிவுகளும் இருந்துள்ளது. கதை/கட்டுரைகள் மற்றும் சிறப்பு/கூட்டுப் பதிவுகளுக்கு அன்று தனிக்கவனம் செலுத்தப்பட்டுள்ளது. மற்றபடி எண்ணிக்கையில் அதிகமானதை தவிர பொதுவாக இடுகைகளின் உள்ளடக்கங்களில் பெரிய மாற்றம் ஏதும் இல்லை. உங்களுடைய பார்வையில் தோன்றுவதை பின்னூட்டத்தில் பகிர்ந்திடுங்கள்.

மேலும், இந்த தொடரை யாரேனும் தொடர விரும்பினால் தொடரலாம். நீங்கள் இதைத் தொடரும் போது வருகையாளர்களுக்கு வசதியாக உங்கள் பதிவின் சுட்டியை இங்கே பின்னூட்டமாக இடுங்கள்.

அன்புடன் குழும ஆண்டு விழா கவிதைப் போட்டி அறிவிப்பு

அன்புடன் குழுமம் இரண்டாண்டுகள் முடித்து மூன்றாம் ஆண்டில் அடியெடுத்து வைக்கிறது. இந்தத் சமயத்தில் அதன் கவிதைப் போட்டி அறிவிப்பு (உங்களில் பலருக்கு ஏற்கனவே தெரிந்திருக்கும். எனினும் இதுவரை அறிந்திராதொருக்காக) கீழே:
-------------------------------------------------------------

இனிய இணைய நெஞ்சங்களுக்கு வணக்கம்!

"இதயம் மீறும் எண்ணங்களால் நாம்
எழுந்து பறப்போமே
இதய நிழலில் இதயம் கிடத்தி
இன்னல் துறப்போமே"

எனப் பாடி, சிறகடித்துப் பறக்கத் தொடங்கியது ஒரு சின்னஞ்சிறு இணையப்பறவை... சிறகை அகலமாய் உயரமாய் விரித்து அன்பால் உலகத்தை அளந்திட்டேன்... இதோ, வானம் விரைவில் என உற்சாகமாய்த் தன்னைச் செலுத்தியபடி இருக்கிறது...

உலகெலாம் அலைந்து தமிழ்ப் பருக்கை கொத்தி, கூடு அடையும் இதயங்களுக்கு ஊட்டியபடி இருக்கும் நம் அன்புடனின் ஈராண்டு நிறைவையும் மூன்றாம் ஆண்டின் தொடக்கத்தையும் ஆனந்தமாய் ஆடலுடன் பாடலுடன் மன நிறைவாய்க் கொண்டாடிட 'அன்புடன்' கவிதைப் போட்டி நிகழ்த்த முடிவு செய்துள்ளது.


போட்டி விபரம்:

கவிதைப் போட்டி ஐவகைச் சுவையின் கீழ் நடத்தப்பட உள்ளது.

1. இயல்கவிதை - வாசிக்கச்சுவை

வழமையான வடிவம் தான். படைப்பாளி தன் கவிதையை யுனித்தமிழில்(Unicode) தட்டச்சு செய்து அனுப்பவேண்டும்.(யுனித்தமிழில் தட்டச்ச இயலாதவர்கள் 'அன்புடன்' உதவியை அணுகலாம் மின்னஞ்சல் : anbudansupport@gmail.com)

2. இசைக்கவிதை* - பாடச்சுவை

சில பாடல்கள் இசையோடு கேட்க இன்பம் கூட்டும். அவ்வகைக் கவிதைகளுகான (பாடல்களுக்கான) பிரிவு இது. படைக்கப்பட்ட கவிதை பாடலாக இசையோடு பதியப்பட்டு அனுப்பப்படவேண்டும்.

3. ஒலிக்கவிதை - கேட்கச்சுவை

சில கவிதைகள் படைப்பாளியின் உணர்வோடு கேட்க நம்மை உலுக்கியெடுக்கும்.அவ்வகைக் கவிதைகளுக்கான பகுதி இது. படைக்கப்பட்ட கவிதை படைப்பாளியின் குரலில் பதியப்பட்டு அனுப்பப்படவேண்டும்.

4. படக்கவிதை** - பார்க்கச்சுவை

புகைப்படங்களுடக்கான கவிதை. பார்வைக்கு வைக்கப்படும் சில புகைப்படங்களுக்குப் படைப்பாளியின் கற்பனை வடிக்கும் கவிதையைத் தரவேண்டும்.

5. காட்சிக்கவிதை* - இயக்கச்சுவை

இது ஒலி - ஒளி கவிதை. கவிதையைக் காட்சியாக்கித் தரவேண்டும்.

* இசைக்கவிதை, காட்சிக்கவிதை பிரிவுகள் புது முயற்சி என்பதால் பங்கேற்பு குறைவாய் இருக்கும் என்றெண்ணுகிறோம். எனவே அவற்றில் பங்கேற்கும்
படைப்புகளுக்கு வெற்றி பெறும் வாய்ப்பு அதிகம்.

** படக்கவிதைக்கான படங்கள் இப்பதிவுடன் இணைக்கப்பட்டுள்ளது.

விதிமுறைகள்:

1. எந்தப் பிரிவுக்கும் தலைப்பு கிடையாது. எந்தத் தலைப்பின் கீழ் எழுதுவது என்பது படைப்பாளியின் விருப்பத்திற்கு விடப்படுகிறது.

2. ஒவ்வொரு பிரிவின் கீழும் ஒரு படைப்பாளி அதிகபட்சமாக நான்கு படைப்புகளை மட்டுமே அனுப்பலாம்.

3.படக்கவிதைக்கான படைப்பை அனுப்புவோர்,எந்த படத்திற்கான கவிதை எனக் குறிப்பிட்டு அனுப்ப வேண்டுகிறோம்.அப்படிக் குறிப்பிடி படாத படைப்புகள் பரிசீலனைக்கு ஏற்றுக் கொள்ளப்பட மாட்டா.

4. படைப்பு முழுக்க முழுக்கப் புதியதாய் இருக்க வேண்டும். முன்னரே எந்த ஒரு ஊடகத்திலும் வெளிவந்த படைப்பாய் இருத்தல் கூடாது.முடிவுகள் அறிவிக்கப்படும்வரை எங்கும் படைப்பை பிரசுரித்தல் கூடாது.முடிவுகள் வெளியானதும் தாங்கள் தங்கள் கவிதைகளை பிரசுரம் செய்துக் கொள்ளலாம்.

5. படைப்பாளியின் பெயர் , தொடர்பு எண் & முகவரி ஆகியவை ஒவ்வொரு படைப்பு அனுப்பப்படும் போதும் குறிப்பிடப் பட வேண்டும்.அவை எக்காரணம் கொண்டும் எங்கும் பொதுவில் வைக்கப்பட மாட்டாது என்று உறுதி அளிக்கின்றோம்.

6. படைப்புகள் வந்து சேர வேண்டிய கடைசி நாள்: 14-04-2007 (சனிக்கிழமை ஏப்ரல் 14, 2007 - சித்திரை மாத முதல்நாள்) இந்திய நேரம் இரவு 12.00 மணி க்குள்.

7. போட்டிக்கு வரும் படைப்புகளைப் போட்டி முடிந்ததும் அன்புடன் குழுமத்தில் பிரசுரிக்கும் அனுமதியை இப்போதே பெற்றுக் கொள்கிறோம்.

8. படைப்பை anbudan.pootti@gmail.com என்ற மின்னஞ்சல் முகவரிக்கு மட்டுமே அனுப்ப வேண்டுகிறோம். அன்புடன் குழுமத்துக்கு நேரடியாய் அனுப்பப்படும்
படைப்புகள் ஏற்றுக்கொள்ளப்படமாட்டா.

9. ஒலிக்கவிதை, இசைக்கவிதை, காட்சிக்கவிதை போன்றவற்றில் கோப்பின் பருமளவு (file size) அதிகமாகும் பட்சத்தில் ஏதாவது ஒரு கோப்பு மாற்று (File Share) இணைய தளத்தில் ஏற்றிவிட்டு அதைத் தரவிறக்கத் தேவையான (link) சுட்டியை மட்டும் anbudan.pootti@gmail.com என்ற மின்னஞ்சல் முகவரிக்கு அனுப்பி வைத்தால் போதுமானது.

10. நடுவர் குழுவின் தீர்ப்பே இறுதியானது.

பரிசு:

மொத்த பரிசு மதிப்பு : ரூ. 10,000/-

ஒவ்வொரு பிரிவிற்கும்:

முதல் பரிசு: ரூ. 1000/-
இரண்டாம் பரிசு: ரூ. 500/-
ஆறுதல் பரிசு: இருவருக்குத் தலா ரூ. 250/-

எனப் பகிர்ந்தளிக்கப்படும்.பரிசுகள் பணமாக வழங்கப்பட மாட்டாது. அத்தொகைக்கு ஈடான புத்தகங்களாக வழங்கப்படும். பரிசுப் புத்தகங்கள்,பரிசு பெறும் படைப்பாளின் தேர்வு. பரிசு பெறும் படைப்பாளி வெளிநாட்டில் வசிப்பவராக இருந்தால், பரிசுப் புத்தகங்களைப் பெற்றுக்கொள்ள அவர் தமிழக முகவரி ஒன்றைத் தரவேண்டியிருக்கலாம்.

முடிவுகள்:

சித்திரைத் திங்கள் இறுதியில் அறிவிக்கப்படும்.

வாருங்கள் இணையத் தமிழ் மக்களே! இனி இது உங்கள் களம். பங்கேற்று மகிழுங்கள். பரிசுகளை வென்றிடுங்கள். கவிதைச் சாரலால் நனைத்திடுங்கள்.

நன்றி.

**படக்கவிதைக்கான படங்களுக்கு இணைப்பை காண்க.

மேலும் தகவலுக்கு : அன்புடன் ஆண்டு விழா 2 - கவிதைப்போட்டி

படம் : 01



படம் : 02



படம் : 03



படம் : 04




படம் : 05



படம் : 06



படம் : 07



படம் : 08



படம் : 09



படம் : 10



-------------------------------------------------------------

கலந்து கொள்ளுங்கள். உங்களின் திறமைகளை எங்களோடு பகிர்ந்து கொள்ளுங்கள் :-)

வெளையாட்டுப் புள்ளயா நீங்க?

வலைப் பதியறவங்களே, வலை மேயறவங்களே,

வலைப் பதியற, வலை மேயற நேரம் போக தமிழ்ச் சேவையெல்லாம் செஞ்சி களைச்சி போயிருப்பீங்க. இதுல சில பேர் என்ன செய்யறதுன்னே தெரியாம சும்மா ஒக்காந்து யாரை வம்புக்கு இழுக்கலாம்னு யோசிச்சிக்கிட்டு இருப்பாங்க. அட, ரொம்ப போரடிக்குதா? வாங்க சும்மா ஒரு விளையாட்டு ஆடிட்டு வருவோம்.

இது வரைக்கும் http://www.higopi.com/ வலைத்தளத்துக்கு மொழி மாற்றிகள், எழுத்துரு மாற்றி ஆகியவற்றை பயன்படுத்தவும், தரவிறக்கவும் மட்டுமே வந்திருப்பீங்க. இனி அங்கே விளையாடவும் வரலாம்.

புதிதாய் சேர்க்கப்பட்டுள்ள http://www.higopi.com/games/ பகுதியில் இப்போதைக்கு Tic-Tac-Toeனு ஒரு விளையாட்டுக்கு நிரல் எழுதி சேர்த்திருக்கேன். Tetris, Snake போல இன்னும் சில விளையாட்டுக்களைச் சேர்க்கலாம்னு இருக்கேன்.

பின்னூட்டத்தில் பொன்ஸ் அளித்த யோசனைப்படி தமிழ் விளையாட்டுக்களை சேர்க்கலாம்னு இருக்கேன்

முடிஞ்சா Sudoku போன்ற விளையாட்டுக்களையும் சேர்க்கலாம்னு நெனைச்சிருக்கேன். ஏற்கனவே இணையத்தில் இது போன்ற விளையாட்டுக்களுக்கு இருக்கும் நிரல்களை சேர்க்காமல் நானே நிரல் எழுதிச் சேர்க்க நினைப்பதால் கொஞ்சம் தாமதமாகலாம்.

விளையாடிப் பாருங்க. உங்களுக்கு பிடிச்ச விளையாட்டு ஏதும் இருந்தா சொல்லுங்க. இந்தப் பகுதியில சேர்த்திடலாம்.

தமிழ்க்காரன் புத்திய காமிச்சிட்டியே

"____க்கெல்லாம் ஆட்டோ போவாது சார். கூட 30 ரூபா ஆவும்".

"இத நீங்க கன்டோன்மன்ட் ப்ரீ பெயிட்ல ஏறும் போதே சொல்லியிருக்கனும். அங்கே பில் போட்டு ஏறினப்போ பேசாம இருந்துட்டு இப்ப ஏன் தகராறு பண்றீங்க?"

"அந்த #$#%$# பசங்க அப்படித்தான் கொறச்சி போட்டு எங்க வயத்துல அடிக்கறாங்க... ஆட்டோ போவாது சார்... எறங்கீக்கங்க"

"ஏங்க, நான் ____க்குன்னு பில் போட்டு தானே வாங்கியிருக்கேன். இன்னும் ஒரு கிலோ மீட்டர் போகனும்... பாதிவழியில இப்படி பண்றீங்க. சார்ஜ் அதிகமா வேணும்னா சங்கம் வச்சிருக்கீங்க இல்ல.. ப்ரீ பெய்ட் ஆளுங்களோட பேசி அதிகம் பண்ணிக்க வேண்டியது தானே... ஏங்க என்னை மாதிரி கஸ்டமர் கிட்ட ராவுடி பண்றீங்க"

"#$#%$# பசங்க ஒக்காந்து பில் போட்டுடறாங்க. இவ்வளவு தூரத்துக்கு அவ்வளவு கம்மியா வராது சார்"

"ஏம்பா யாரோ புதுசா பெங்களூரு வர்றவன் கிட்ட நீ அப்படி சொன்னா நம்புவான், நான் பெங்களூர்க்கு பழைய ஆளு. கன்டோன்மன்ட்ல இருந்து ____க்கு சரியா 11 கிலோமீட்டர் வரும். இப்ப 10 கிலோமீட்டர்ல நிக்கறோம் கிலோமீட்டருக்கு 6 ரூபான்னு பாத்தா சரியாத்தானே போட்டு இருக்கு பில்லுல?"

"தமிழ்க்காரன் புத்திய காமிச்சிட்டியே"

"என்னய்யா சம்பந்தமில்லாம ஒளர்ற... இதுல தமிழ்காரன் புத்தி எங்க வந்தது? 'வட்டிப் பணம் வாங்கறதே பாவம்னு ____ல சொல்லியிருக்கு'... குடுக்க வேண்டியதவிட அதிக காசு கேக்கறயே... இது எந்த புத்தி ? நீ உண்மையிலேயே ____தானா... இல்லை அது வெறும் அடையாளமா?"

"#$#%$# அதெல்லாம் முடியாது இங்கேயே எறங்கிக்க... காசு குடு"

ஆட்டோவை விட்டு இறங்கி நூறு ரூபாய் நோட்டை தந்தேன்.

"சில்லரை இல்ல".

பக்கத்திலிருந்த செருப்பு தைக்கும் கன்னடரிடம் சில்லரை மாற்றி ஆட்டோக்காரனிடம் "நல்லாயிரு" என்று சொல்லி சரியாய் தரவேண்டிய பணத்தை தந்தேன். நடந்ததை கவனித்துக் கொண்டிருந்த அந்த செருப்பு தைக்கும் கன்னடரும் "சில ஆட்டோக்காரனுங்க எப்பவுமே இப்படித்தாங்க பாதி வழியில கழுத்தறுப்பாங்க" என்று தத்தைத் தமிழில் சொன்னார்.

"தமிழ்க்காரன் புத்திய காமிச்சிட்டியே" சொன்னது கன்னடர் இல்லை... கர்னாடகத்துக்கு என்னைப் போலவே பிழைக்க வந்த ஒரு வேற்றுமொழிக்காரன்.

ஏற்கனவே நன்கு படித்த தகவல் தொழில்நுட்ப "கன்னடக் கூட்டா" மக்களின் "அறிவுக்கு ஒவ்வாத" பேரணி... அதில் அவர்கள் எழுப்பிய கோஷத்தால் வருத்தத்திலிருந்தேன்.

மறுபடி ஒரு முறை மனம் "I should quit this place at the earliest possible" என்று சொல்லிற்று. ஏனோ தெரியவில்லை ஹைத்ராபாத்தில் இருந்த வரை என்றுமே இப்படி எண்ணியதில்லை.

அதியன் 2.0.2 வெளியீடு

அதியன் ஃபயர்ஃபாக்ஸ் நீட்சியின் அடுத்த வெளியீடான 2.0.2ஐ இங்கே தரவிறக்கம் செய்து நிறுவிக் கொள்ளலாம்.

மாற்றங்கள்:

1) TSCII -> Unicode மாற்றத்தில் ஒரு சிறிய வழு சரிசெய்யப்பட்டது.
2) ᮯᮯ போன்ற (Character Encoding -> UTF8 என்று வைத்த பின்னும்) படிக்க இயலாத எழுத்துக்களை மாற்றி படிக்க முடியும்.
(புது ப்ளாக்கரில் இந்த வழுவை சரி செய்ய எழுதிய நிரலில் சிறு மாற்றம் செய்து இணைத்துவிட்டேன் )

இந்த மாற்றங்கள் அதியமான் மாற்றியிலும் சேர்க்கப்பட்டுவிட்டன

இந்த வெளியீடு கூடிய விரைவில் மொசில்லா நீட்சிகள் தளத்திலும் கிடைக்கும். அப்போது ஏற்கனவே இந்நீட்சியை நிறுவியுள்ளோரின் உலாவிகள் தானியங்கு முறையில் தரவிறக்கி புதுப்பித்துக் கொள்ளும்.

புது ப்ளாக்கரில் கோபி பிரச்சனை

புது ப்ளாக்கருக்கு மாறிய வலைப்பதிவுகளி்ல் சில இடுகைகளில் பின்னூட்டங்களில் பின்னூட்டமிட்டவர் பெயர் accented ஆகத் தெரிகிறது.

புதிய இடுகைகளின் பின்னூட்டங்களில் பின்னூட்டமிட்டவர் பெயர் சரியாக தெரிகிறது. எனினும் பழைய இடுகைகளில் ஏற்கனவே உள்ள பின்னூட்டமிட்டவர் பெயர் accented ஆகத் தெரிகிறது.

இது குறித்து ப்ளாக்கரின் Known Issues பக்கங்களில் பார்த்தால் "ஆங்கிலமல்லாத வலைப்பதிவுகளுக்கான ஆதரவு தருவது மிகப்பெரிய வேலை... சென்று கொண்டிருக்கிறது" என்று சொல்லியிருக்கிறார்கள்.

நமது வலைப்பதிவின் வார்ப்புருவில் மாற்றம் செய்து பழைய இடுகைகளில் ஏற்கனவே உள்ள பின்னூட்டமிட்டவர் பெயரை சரியாக தெரிய வைக்கலாம்.

உங்கள் வார்ப்புருவில் </HEAD> என்பதற்கு முன்னால் கீழ்க்காணும் நிரல்த் துண்டை சேர்த்திடுங்கள்:

<script>
function asc2uni(istr)
{
 retstr = ""; 
 i = 0;
 while( i < istr.length)
 {
     if(istr.charCodeAt(i) < 128 || istr.charCodeAt(i) > 255  )
     {
         retstr += String.fromCharCode(istr.charCodeAt(i));
         i++;
     }
     else
     {
         chr = istr.charCodeAt(i+2);
         if(istr.charCodeAt(i+1) == 175)
             chr += 64;
         retstr += "&#x0B"+ tohex(chr)+";";
         i+=3;
     }
 }
 return retstr;
}

function tohex(i)
{
 hexarr = '0123456789ABCDEF'.split("");
 a2 = '';
 ihex = Math.floor(eval(i +'/16'));
 idiff = eval(i + '-(' + ihex + '*16)');
 a2 = hexarr[idiff] + a2;
 while( ihex >= 16)
 {
     itmp = Math.floor(eval(ihex +'/16'));
     idiff = eval(ihex + '-(' + itmp + '*16)');
     a2 = hexarr[idiff] + a2;
     ihex = itmp;
 }
 a1 = hexarr[ihex];
 return a1 + a2 ;
}
</script>

பின்னர் வார்ப்புருவில்

பழைய ப்ளாக்கர் வார்ப்புரு எனில்:

<$BlogCommentAuthor$> என்பதைத் தேடி அதை கீழ்க்கண்டவாறு மாற்றிக் கொள்ளுங்கள்:

<script>
document.write(asc2uni('<$BlogCommentAuthor$>'));
</script>


புதிய ப்ளாக்கர் வார்ப்புரு எனில்:

ஜெகத் கைமண்ணளவு பதிவில் சொல்லியபடி செய்யுங்கள்

வார்ப்புருவை சேமித்திடுங்கள். அவ்வளவு தான்! இப்போது உங்கள் வலைப்பதிவின் பின்னூட்டப் பெயர்கள் "கோபி (Gopi)" என்பது போல் சிதறாமல் "கோபி (Gopi)" என்பது போல் சரியாய் காட்டும்.

பி.கு:
1) இது உங்கள் இடுகையிலுள்ள பின்னூட்டப் பெயர்களை மட்டுமே சரியாகக் காட்டும். ப்ளாக்கர் பின்னூட்டப் பெட்டியில் சரி செய்ய இயலாது.
2) இது ஒரு தற்காலிக தீர்வே. இப் பிரச்சனையை ப்ளாக்கர் சரி செய்துவிட்டால் தேவைப்படாது.
3) இந்த நிரல் ஒருங்குறியி்லுள்ள எல்லா மொழிகளுக்குமானதல்ல. தமிழுக்கு மட்டுமே சரியாய் செயல்படும்.

மணி மேனேஜர் Ex இப்போது தமிழில்!

மணி மேனேஜர் Ex என்பது தனிநபர் பண மேலாண்மைக்காக உலக அளவில் பரவலாய் பயன்படுத்தப்படும் ஒரு கட்டற்ற திறவூற்று மென்பொருள் (free open source software).

இச்செயலி மூலம் தனிநபர் எவரும் தன்னுடைய ஒவ்வொரு வரவு செலவையும் கணக்கில் கொள்ள இயலும். அது மட்டுமல்லாமல் ஒவ்வொரு ஆண்டுக்கான வரவு செலவு திட்டத்தை (Budget) அமைத்து, வரவும் செலவுகளும் அத்திட்டத்துள் செயல்படுகின்றதா (Budget Performance) என்பதை கண்காணிக்க இயலும்.

இதன் அறிக்கைகள்(Reports) வசதி மூலம், குறிப்பிட்ட கால வரையில் நாம் செலவிடும் பணம் எங்கு, எவருக்கு, எவ்வளவு செல்கிறது என்பதை தெளிவாக அறிந்திட இயலும்.

மேலும், இச்செயலியில் பங்கு சந்தை, வாகனம், நிலம், நகை இதர முதலீடுகளையும் அதன் விவரங்களையும் இட்டு அதன் தற்போதைய மதிப்பினை கணக்கிட இயலும்.
(உ.ம்:இச்செயலியின் அறிக்கையின் வாயிலாக எனது வாகன எரிபொருளுக்கான ஆண்டு செலவையும் வாகன முதலீட்டின் தற்போதைய மதிப்பையும் அறிந்து, செலவைக் குறைக்க முடிந்தது)

மொத்தத்தில் இந்த செயலி எந்த ஒரு கணத்திலும் நம் நிதி/சேமிப்பின் தற்போதைய மதிப்பு என்ன என்பதை அறிந்திடவும், தேவையற்ற செலவுகளை குறைத்து, தேவையானவற்றில் சரியான வழியில் செலவிடவும் திட்டமிட/கண்காணிக்க உதவும் ஒரு சிறந்த மென்பொருள்.

பல்வேறு கட்டற்ற தமிழ் கணிமை திட்டங்களை குறித்து முகுந்த் அவர்களுடன் கலந்தாலோசித்துக் கொண்டிருந்த போது இச்செயலியின் தமிழாக்கம் குறித்தும் பேசப்பட்டது. பின்னர் இச்செயலியினை வடிவமைத்து நிரல் திட்டத்தை நடத்தி வரும் மதன் கனகவேல் (இவர் ஒரு தமிழர்) அவர்களுக்கு மடல் அனுப்பிய போது, இச்செயலியினை தமிழில் மாற்ற இசைவு தெரிவித்தார். உடனடியாய் தமிழா! மொழிபெயர்ப்பு வலைத்தளத்தில் இதற்கான ஏற்பாடுகள் செய்யப்பட்டு, ஒருவாரத்துக்குள் தமிழாக்கம் நிறைவு செய்யப்பட்டது. இத்திட்டத்தில் பெருமளவில் நானும், முகுந்த் அவர்களும் பங்கு பெற்றோம்.

நான் முதன் முதலாய் நிரல் எழுதாமல் தமிழாக்கத்தில் மட்டும் பங்கு பெற்ற தமிழ் கணிமைத் திட்டம் இது.

இவ்வாரம் வெளியான இதன் புதிய வெளியீடான மணி மேனேஜர் 0.8.0.2வில் தமிழ் மொழி தெரிவு சேர்க்கப்பட்டுள்ளது. இச்செயலியை மணிமேனேஜர் தரவிறக்கப் பக்கத்திலிருந்து இறக்கி நிறுவிக் கொள்ளலாம்.

நம் பணம் எப்படியெல்லாம் செலவிடப்படுகிறது என்பதை அறிந்து கொள்வோம்! தேவையற்ற செலவுகளை குறைக்க திட்டமிடுவோம்!